Es Pennsilfaanisch Deitsch Eck
(Originally published in the September 13, 1989 issue of The Shopping News)
D. LUKE BIEMESDERFER
IN MEMORIAM
Nooch en Granket vun drei Daage is der D. Luke Biemesderfer uff Mittwoch der zwett Aagscht 1989 vun uns gange. Er waar 95 Yaahr alt wu er uns verlosse hot. Zwee-un-zwanzich Yaahr, vun 1943 bis 1965, waar er der President vun Millersville State College, was sich nau die Millersville University heest.
Der Luke, wie sei Freind ihn gheese hen, un sei Fraa, die Elva Walter Biemesderfer, hen’s letscht in Lititz gwuhnt. Die Biemesderfers hen sich gedroffe wu sie zwee yungi Schtudende waare an Millersville State Normal Schul. Uff dem 28schde vun Juni 1989 hen sie ihr 67scht Hochzichdaag gfeiert.
Im Yaahr 1917 waar er faddich mit sei Schuling an Millersville. In 1921, hot er en Bachelor of Arts Degree grickt vun Franklin un Marshall College. Die University vun Pennsylvania hot ihm en Masters of Arts Degree gewwe im Yaahr 1931. Muhlenberg College hot ihm en Dokder vun Letters gewwe in 1944, un Franklin un Marshall College hot ihm en Honorary Dokder vun Science Degree gewwe in 1950.
Der Luke Biemesderfer is an Kissel Hill in Warwick Taunschip gebore uff dem neinzeht Yenner im Yaahr 1894. Sei Eldre hen Horace N. un Clara Harnish Biemesderfer gheese. In sellem Taunschip hot er schpaeder no Schul ghalde vun 1911 bis 1915. Noochderhand waar er en Schulmeeschder un Hochschul-Principal in Christiana, Strasburg, Mauch Chunk un Mount Joy. Vun 1924 bis 1943 waar er der Supervising Principal vun de Schule in Manor Township do an der Millerschtadt rum. Vun datt aweck waar er no 22 Yaahr lang der President vun College in der Millerschtadt. Wu der Dr. Biemesderfer President warre is vum College hen sie about 400 Schtudende ghat. Wu er in der Ruheschtand gange is, hot’s College iwwer 2500 Schtudende ghadde. (Heidesdaags hot’s College iwwer 7000 Schtudende.) In der Zeit wu der Luke President waar hen sie am wenigschdens acht neie Gebeier uffgeduh.
Im Yaahr 1967 hot der Dokder Biemesderfer der Naame “President Emeritus” grickt. Noochderhand, im Yaahr 1973, hot es Gebei as frieher die alt Library waar der Naame Biemesderfer grickt. Des waar en Ehr fer der Luke awwer aa fer sei liewi, gudi Fraa, Elva. Die Elva Walter Biemesderfer is en Denver Maedel un kummt vun der Denver (Bucher Daal) Gegend. Des Gebei heest nau der Biemesderfer Executive Center. Datt drin hengt en wunnerbaar schee Pickder vun Luke un sei Fraa. En paar Yaahr eb sell hot’s College en neier Stadium gebaut. Sell hot aa der Biemesderfer Naame grickt.
Zidder 1924 sin die Biemesderfers Glieder vun der Ludderisch Karich in der Millerschtadt. Iwwer 50 Yaahr lang waar der Luke en Sunndaag Schul Tietscher datt. Luke waar en Soldaat im Erschde Welt Grieg un im Zwedde Grieg waar er uff dem Selective Service Board.
Biemesderfer hot viel geduh fer anner Leit, abbadich die Millerville Lions Club, wu er en Charter Member waar; fer die Patton Masonic Schul fer Buwe in Elizabethtown; fer die Pennsylvania German Society. Er waar der Haaptmann vun die Lengeschder Kaundi Vo-Tech Authority, vun die Sico Foundation Board, vum Lengeschder Kaundi Community Chest un United Way. Der Luke is oft beehrt warre fer alles as er geduh hot fer so viel Leit helfe.
Im Yaahr 1987 waare Luke un Elva Biemesderfer die erschde as uff em Honor Roll of Distinguished Pennsylvania Germans vun dem Millerville University Center for Pennsylvania German Studies kumme sin. Bischli-Gnippli is der Direkder vun dem Center.
Dr. Biemesderfer hot sei Fraa un drei Kinner hinnerlosse: Zwee Buwe, Robert W. un C. Daniel, un en Maedel, Martha, die Fraa vun Parre Frederick Vander Poel. Es sin 10 Kinskinner un sechs Urkinskinner. En Schweschder, die Marion Mentzer vun Hershey, is noch am Lewe.
***
Der Luke un Elva Biemesderfer bleiwe allfatt fer Bischli-Gnippli en wunderbaar Beischpiel vun Pennsilfaanisch-Deitsch Leit as weit un hoch kumme sin im Lewe awwer nie net vergesse hen wu sie harkumme un was es meent Deitsch zu sei. Sell hot gmeent: viel lache, aa iwwer sich selvert, un sich selwert net ZU arnscht zu nemme. Allimohl as die Biemesderfers un Bischli-Gnippli sich enanner gsehne hen, hen mir allfatt ebbes zu saage ghadde im Deitsche. Bischli-Gnippli gleicht aa viel zu lache un mit Wadde schpiele, awwer der Luke Biemesderfer hot Bischli-Gnippli allfat gebodde. Bischli-Gnippli waar allfatt hinnedraa un der Luke vannenaus. Ya, sell waare scheeni Yaahre wu der Luke Biemesderfer der President vum Millersville College waar. Soddiche Yaahre gebt’s nimmi widder.
Aa wann mir nau “Auf Wiedersehen” rufe misse zum Luke Biemesderfer, mir vergesse sei Beischpeil, sei Exempel, nie net. Er hot uns gwisse wie en kummener Deitscher en hochi Lanning griege kann vun viele Ehre sammle kann, awwer dabei nie net sei Harkummes vergesse! Der Luke Biemesderfer waar en guder Deitscher un en guder Grischt. Hadyee, Luke!
September 13, 1989
En drauerich Bischli-Gnippli